相信部分巴絲打都試過明明準時出門口,但就因為班車等極唔到,或者等𨋢等耐咗,最終搞到自己遲曬到。不過以後呢啲情況應該會減少喇,近日政府向立法會申請撥款3億,發展空間數據共享平台同3D數碼地圖,畀大家用嚟查閱交通資訊,更好規劃路線,準時抵達目的地。

空間數據共享平台類似一間數據「超級市場」,大家可以入去查閱路面交通狀況、公共交通工具到站時間、實時泊車位數據等資訊,等你出門路路暢通。3D數碼地圖就幫大家將主要建築物嘅室內布局睇通睇透,即使第一次去都唔會變「盲頭烏蠅」。政府計劃响2022年底或之前,將149個空間數據集開放畀公眾下載使用,亦會响2023年底或之前推出3D數碼地圖,可以顯示1250幢建築物嘅內部間隔。

圖:發展局、Emojipedia