隨住全球暖化加劇,北極融冰日益嚴重,棲息當地嘅北極熊成為最大受害者。近日有隻北極熊闖入俄羅斯Norilsk市區覓食,專家估計北極熊係因為原居海域被破壞,搵唔到食物,所以被迫游1500公里上陸地搵食物「醫肚」。

當時隻北極熊好虛弱,攰到幾乎行唔到路,連眨眼都無力。佢肚餓到連馬路上來來往往嘅車都唔理,一心走去垃圾堆填區同廢墟搵嘢食。之後有市民發現隻北極熊响郊區出現,睇落仲無厘神氣,長時間伏响地下,只係間中撐起身搵食物。當局已經派人捉走隻北極熊,預料經檢查後會送返去原居海域或者交畀動物園照顧。

有野生動物專家認為,隻北極熊原本住响北極海域,由於實在太肚餓,唯有越過Taymyr半島,千里迢迢去到Norilsk搵食。小編見到段新聞,真係好心酸,希望大家真係要為環保出一分力,保護北極熊嘅家園。

圖:The Siberian Times