動畫《蠟筆小新》中嘅小新人細鬼大,耐唔耐都會「關心」吓松坂老師嘅感情生活,令人哭笑不得。現實中,山東都有個小朋友好著緊老師嘅感情生活,作文時仲大爆阿sir長期單身,並表示好擔心~搞到對方都唔知畀咩反應好XD

呢個小朋友讀緊小學5年班,上堂要作一篇題為〈一個熟悉的人〉嘅文,平時鬼鬼馬馬嘅佢決定以負責改文嘅阿sir做文章主角。文中提到阿sir脾氣好好,但就無拖拍,29歲仲係單身,驚老師呢一世都無女朋友。可能小朋友覺得咁樣寫好hurt,自己有啲淆底,於是最後祝阿sir快啲搵到另一半,又讚老師靚仔,希望篇文唔好咁低分~

阿sir收到呢篇「傑作」後,笑又唔係嬲又唔係,唯有用紅筆寫返句:「讓您老人家操心了!」其他網友睇完就笑到碌地,話小朋友有前途XD亦有人指阿sir堅係nice,所以小朋友先夠膽咁樣作文~

圖:梨視頻、Emojipedia