大家成日呢度去嗰度去,又知唔知香港其實都好有文青氣息?位於荃灣嘅南豐紗廠最近舉辦《舊課本——那些美好的風景》展覽,當中佈置咗一個課室,大家可以坐喺舊時嘅學生枱櫈上面,研究吓同今時今日有咩唔同,而畢咗業嘅朋友仔,就可以回憶返那些年,打吓卡咁。其實呢個「課室」仲有舊時嘅課本、校服、風紀帶等展出,總有一件可以成為你最愛嘅打卡道具~


以前課室裡面無電腦,如果老師想用畫面教書,就要靠掛畫喇。老師就會將啲掛畫掛喺黑板上面,等學生有更深入嘅認識。紗廠同時展出咗幾款校服,大致上同而家差唔多,亦都介紹咗以前嘅校服公司,唔知大家有無去過買校服呢?


呢個展覽展出幾十本舊時嘅教科書,除咗中英數之外,仲有而家已經併入常識科嘅社會同健康教育科,雖然啲書封面設計簡單,但都算係色彩繽紛。展覽由即日起至7月10日舉行,開放時間為星期一至日每朝10點至夜晚8點,放假得閒不妨約埋三五知己參觀吓。