各位絲打有無開燈瞓覺嘅習慣呢?如果有就要留意喇,最近美國國立衛生研究院研究發現,女性夜晚瞓覺嗰陣,如果開住燈或者電視瞓覺,會越瞓越肥!所以大家記得熄曬睡房裡面啲光源先瞓。

呢個研究以問卷調查咗43,722位介乎35至74歲身體健康、作息正常同無懷孕女性嘅瞓覺習慣,睇吓佢哋响夜晚唔開燈、開一盞閱讀燈、睡房外有燈光、開睡房內嘅燈/電視4種情況下瞓覺,約五年後體重會唔會有差距。結果顯示,唔開燈或開一盞光度較低嘅閱讀燈瞓覺,唔會致肥;响睡房外有燈光嘅環境瞓覺,變肥機會好微;開住睡房內嘅燈/電視瞓覺,體重增加5公斤以上嘅機會率多咗17%!如果呢個習慣無改到,體重會繼續增加。

研究其中一位負責人Chandra Jackson博士表示,人類與生俱來就習慣朝早有陽光,夜晚黑麻麻,如果瞓覺嗰陣仲要畀燈、電視等發出嘅人造光線照住,身體荷爾蒙會產生變化,繼而影響健康。

圖:Nutritious Life