去旅行見到靚景,相信大家都會影低留念或者同朋友開心share,咁有無諗過將啲相用嚟參加比賽,畀全世界人欣賞呢?本年度《國家地理雜誌》旅行者攝影大賽結果日前揭曉,重慶攝影師儲衛民憑作品《格陵蘭的冬天》,勇奪大賽冠軍同城巿組別第一名,獲得7500美元(約6萬港元)獎金。

《格陵蘭的冬天》呈現當地漁村Upernavik嘅美麗雪景同特有生活,各色房屋响白雪中特別吸睛,而唔同顏色代表嗰間屋嘅用途,例如紅色係店舖,藍色係民居,方便民眾响落雪時辨認。

為咗影呢張相,儲衛民用咗6日去揾最好嘅角度,終於响一個零下30°C暴風雪傍晚完成拍攝。儲衛民覺得相中嘅一切好和諧,深藍天色畀人涼爽嘅感覺,但行緊嘅一家三口流露出歡樂,冰雪之下,嗰一刻依然暖入心。

圖:National Geographic