等到條頸都長曬,「香港玩具節2019」終於喺今日正式開鑼喇!場內亮點多籮籮,有車迷愛好者不容錯過展會限定模型車、有掃平價玩具嘅「玩具特賣場」、B.Duck彈床遊樂園等,聽日同後日仲有考你眼光$1拍賣會,以及爆旋陀螺盃,咁多精彩活動,又點可以錯過呀!


嚟得玩具展,梗喺想揾吓啲特色玩具,今年「微影TINY」推出限定嘅消防處概念救護車,車身喺黃色,認真特別!至於全港首賣TOMICA豐田日本的士、全球獨家TOMYTEC萬事得RX-7 Type RS-R型號模型車,加埋部分款式喺全港首賣嘅爆旋陀螺,真係數到手軟!


小編入場行吓行吓,仲見嗰巨型夾公仔機,超級搶Fo!原來以為咁大部機,實好難掌握,但見到幾嗰人玩,都輕易夾中,仲有嗰小朋友夾到大奬,搞到小編都心郁郁,想露返兩手。如果想玩返正常版,呢嗰攤檔都有提供少量夾仔機,獎品係近期熱爆嘅超級英雄蜘蛛俠同埋萌爆柴犬添!


想買返幾件平靚正玩具嘅話,就一定要去「玩具拍賣會」,最平$100有5件!今年仲有B.Duck超大型充氣滑梯和彈床,現場仲有B.Duck精品發售!場內仲有唔少打卡位,好似九巴期間限定店展示兩架小九巴比一眾巴士迷影相。


睇得七七八八準備走?咪住,記得拎埋票尾去禮品換領站,可以免費換領玩具一份架。至於喺乜玩具,小編都答你唔到,因為禮物喺由工作人員隨機抽,最後拎到乜,就要睇你運氣喇!


日期:

6月14日(周五) 10:00-21:00;

6月15日(周六) 10:00-21:00;

6月16日(周日) 10:00-20:00

地址:灣仔香港會議展覽中心展覽廳3B,3C &3D

門票:HK$30 (即場發售)