DSE中文科份卷成日畀人話係「死亡之卷」,尤其係文言文嗰part,搞到唔少巴絲打投曬降:( 咁如果篇文係講Marvel英雄,大家又會唔會畀多啲心機去讀呢?近日內地網上流傳一篇〈鐵甲奇俠傳〉嘅文言文,係一位中學中文老師寫嚟畀學生做閱讀理解嘅,唔少網民睇咗都覺得好感動!

〈鐵甲奇俠傳〉一開波介紹Iron Man生平,點出Tony年紀輕輕就無咗爸爸媽媽嘅慘痛經歷。之後寫到「聯雷神,破洛基,平奧創,寰宇震慄」,講出鐵甲奇俠同雷神等超級英雄一齊K.O.洛基、奧創等反派。今年上畫、引爆全球粉絲蜂擁入場嘅《復仇者聯盟4:終局之戰》劇情,篇文言文都有提及,話奸角魁隆令成班英雄「皆被重創」,結局時Iron Man「瞋目怒曰,吾乃鋼鐵俠」,型爆咁同魁隆講出自己個名,再輕輕彈一彈手指,就用無限手套消滅對方。篇文將電影入面Iron Man嘅征戰歷程寫到勁到肉,睇嚟呢位老師係復仇者聯盟嘅超級擁躉喎XD

呢篇奇文被網友廣傳,當中好多人都話第一次睇文言文睇得咁輕鬆有趣。咦~咁易明,相信班學生好容易攞到高分喇!

圖:Festival Wallpaper、微博@_長相守_