响香港人人有書讀,其實真係好幸福。响印度,依然有好多小朋友因為家境貧困而無得返學,被迫去打工搵錢。有見及此,當地一間學校諗出條「環保賺學費」嘅橋,學生只須帶塑膠垃圾返學,就可以免費讀書。

學校由慈善團體Akshar Foundation於2016年成立,規定學生每星期帶25件塑膠垃圾返嚟,之後將呢啲廢膠送到校內回收中心,混合水泥整成環保建材,咁樣就等於交咗學費。呢個方法將教育、產業同環保結合,既幫學生解決咗學費問題,有學返又唔使去當地採石場做苦工,亦解決咗附近居民用廢膠點火取暖所造成嘅空氣污染問題。

學生除咗可以有書讀,學校亦畀佢哋賺返些少幫補家計,師兄姐可以做助教,幫師弟妹補習賺取代幣,再用嚟响鄰近商戶買文具、衫褲等日用品。校方話學生掌握嘅知識同技能越多,人工就越高,如果犯錯會被罰錢,希望令學生有動力做個模範生。學校未來想同政府合作,推廣環保辦學模式,並於五年內响印度建立100間類似嘅教育機構。

圖:Akshar Foundation