返工要有咩態度?盡責肯定係其中之一。近日有巴打响網上討論區出post,話遇過一位智障人士嚟送外賣,但唔小心打瀉咗pizza,於是拒收貼士並自費賠償畀巴打。外賣員嘅行為令巴打好感動,亦得到網友讚賞。

外賣員發現出錯之後,「一路喊一路講對唔住」,解釋話係因為過馬路嗰陣被衝燈嘅小巴嚇親而導致。巴打見佢無乜大礙,表示唔介意並照收食物同畀貼士。點知外賣員唔肯要貼士,話做得好先可以收,做得唔好唔可以收,仲話係已經離世嘅爸爸教嘅,令巴打既心酸又感動。之後外賣員透過所任職嘅薄餅店同巴打講,願意自費補送pizza。巴打諗住拒絕,但外賣員堅持要送,最後外賣員被店家說服,唔使自己出錢。

好多網友都被外賣員感動,並大讚佢守規矩、做得好,亦有人呼籲多啲支持自力更生嘅智障人士,因為「佢哋畀人讚做得好就會好開心」。

圖:Inspire Conversation