夏日熱辣辣,相信好多巴絲打都想好似《哆啦A夢》嘅大雄咁,用隨意門去南極避暑,但多啦A夢不是大家的點算好?不如近近哋去廣州花都區嘅融創雪世界喇!呢個華南最大室內滑雪場將於15號開幕,想被冰雪包圍?盡情享受滑雪、玩雪樂趣?絕對無難度~

融創雪世界總面積達75000平方米,可以同時容納3000個遊客。場內室內溫度保持-3℃至-5℃,令40厘米厚嘅積雪唔會融化。雪世界分滑雪區、娛雪玩樂區同下雪體驗區三個區域,分開賣飛。大家嚟到要先按需要借用專業滑雪衫、雪靴、滑雪板或雪杖,著好曬再入場。

滑雪區係世界最先進第四代室內滑雪場,呢度嘅雪道一啲都唔簡單,最大坡度可達23度,仲有世界最長嘅室內雪道(460米)、世界首創嘅立體交叉雪道等,齋聽都已經知道好玩。雪道按難度分為小熊道(零基礎者滑道)、雪兔道(初級滑道)、麋鹿道(中級滑道)同老虎道(高級滑道),第一次滑雪嘅朋友可以預約教練指導,教練會先講解滑雪裝備點樣用,再教滑雪基本動作,並會响試滑過程中作出提點。

娛雪玩樂區有唔少遊戲項目,好似「雪上飛碟」咁,玩家會坐住個大型充氣雪圈從高處瀡落嚟;「探險步道」係佈置咗各種關卡嘅通道,玩家須要克服障礙去到終點,考驗大家嘅智慧。如果只係想靜靜睇吓雪嘅朋友,下雪體驗區就啱曬你,呢度以「雪之教堂」為中心,搭建一條歐洲小村莊。睇住白雪飄舞,係咪覺得好浪漫呢?咁就快啲帶埋你嘅男/女神嚟喇!

廣州融創雪世界資料:

開幕日期:2019年6月15日(星期六)

地址:廣州市花都區鳳凰北路78號融創文旅城

營業時間:

6至8月及中秋、國慶: 09:00 - 22:00

9月:10:00 - 21:00

10至12月:10:00 - 22:00

注:閉園前一小時停止檢票

門票(人民幣):

2小時娛雪票(娛雪玩樂區、下雪體驗區使用):180元(平日);228元(旺季)

3小時滑雪票(滑雪區小熊道、雪兔道使用):268元(平日);338元(旺季)

4小時滑雪票(滑雪區所有滑道使用):308元(平日);398元(旺季)

不限時滑雪票(滑雪區所有滑道使用):358元(平日);458元(旺季)

圖:廣州融創樂園、搜狐