每年六月至十月,本港南丫島深灣沙灘都會有綠海龜嚟產卵,為咗保障綠海龜响繁殖過程中唔被干擾,能夠平平安安生BB,漁農自然護理署即日起至10月31號封閉深灣沙灘,禁止市民進入。

綠海龜被世界自然保護聯盟列為「瀕危」物種,平均每1000隻小海龜中,只有一隻可以活到成年。响香港,所有海龜品種亦被納入《野生動物保護條例》、《動植物(瀕危物種保護)條例》及其他相關條例保護範圍。綠海龜繁殖過程受唔少威脅,因為佢哋有返回出生地產卵嘅習性,而每年總有部份市民無視封灘禁令,闖入海灘紮營,嚇到啲綠海龜唔敢上岸,被迫响海中產卵,導致好多小海龜未出世就命喪大海。另外有市民响深灣海域搞水上活動或停泊、駕駛遊艇,亦會令綠海龜唔敢返嚟深灣產卵。

大家千祈唔好騷擾啲綠海龜,除咗係保護佢哋之外,亦避免觸犯法例。深灣封閉期間,任何人非法進入即屬違法,最高可被罰款港幣五萬蚊。深灣會有執法人員巡邏,防止市民擅自進入,並監察海龜產卵情況。

圖:生態教育及資源中心