荷蘭著名畫家梵高講過「我繪畫我嘅夢想。」如果可以走入《向日葵》、《隆河上的星夜》、《在亞爾的臥室》等名作之中,會唔會更易領略到呢位天才嘅深意呢?深圳中國華潤大廈藝術中心即日起舉辦「追光者──天才梵高築夢大展」,設有11個主題展區,運用AI、AR、光影特效等多媒體技術,呈現21幅梵高名畫,等參觀者融入其中,探索大師夢想。


面積約400平方米、層高近八米嘅「星空」展廳呈現《隆河上的星夜》,呢度以大量環繞式投影打造出包圍參觀者嘅星空,仲擺放小燈塔同小木橋。參觀者抬頭可以望見月亮起落、星星迴旋,加埋投映嘅月光,令觀眾猶如親臨其境。


而小編推介嘅打卡必到位置,係向日葵花海鏡房,一入去就會被一大片向日葵包圍,透過多面玻璃鏡嘅「魔術」,參觀者會見到無數個自己置身於花海之中,打卡之餘又可以體會梵高創作時嘅熾熱心境。


梵高中意以畫表現內心嘅烏托邦世界,《豐收在普羅旺斯》嘅麥田一望無際,展覽螢幕上嘅麥穗隨風輕輕晃動,充滿生命力。展覽同時立體還原《在亞爾的臥室》,根據四季時節同梵高嘅喜怒哀樂打造出九種風格嘅臥室,既精彩又有趣。如果呢九間房都唔係心水之選,參觀者可以即場用智能燈光技術任意修改色彩,幫梵高「度身訂造」睡房XD


睇完咁多幅畫之後,如果想將佢哋帶返屋企點算好?展覽會售賣關於梵高及相關作品嘅圖書、明信片、T恤、帽等周邊產品,而用「梵高追光者」app掃瞄產品圖像,仲會响手機呈現5D特效添!唔講咁多,約埋朋友上去朝聖先!


「追光者──天才梵高築夢大展」資料:

展覽日期:即日起至9月28日

地點:中國華潤大廈藝術中心(深圳市南山區深圳灣萬象城B1層,近後海地鐵站)

開放時間:每日上午10時 至下午10時(下午9時停止入場)

入場費(人民幣):

早鳥票:128元(6月28日或之前有效)

通票:188元

工作日票:168元(限展覽期間法定工作日使用,週末及法定節假日不可用)

家庭票:450元(2位成人及1位身高1.3米或以下兒童)

圖:深圳吃貨小分隊、TOP深圳