近年牛油果好受歡迎,除咗營養價值高,仲貪佢可以配搭多種食材,例如整成牛油果多士、奶昔、沙律等等。食完牛油果之後,總喺會剩低一大粒核,相信大家同小編一樣,都會隨手掉咗佢。唔講唔知,原來呢粒核好有用,有位嚟自墨西哥化學工程系畢業生Scott Mungía就將呢粒核加工成即棄餐具,好有諗頭!

Scott注意到北美洲對牛油果需求增加,同時有大量果核被棄置,於是佢用咗三年半時間,研究將牛油果核轉化成生物塑料(Bioplastics)嘅技術,再製成各種即棄餐具同飲管。呢種餐具可以存放喺乾爽地方一年,並可以喺240日內由生物降解,仲唔會留低任何垃圾,比起普通塑膠餐具要用100年去分解快得多。

Scott憑住呢個技術已喺2013年獲得專利,仲成立咗間公司Biofase,現時相關產品已出口到超過11個拉丁美洲國家。唔知香港幾時會有呢隻產品呢?

圖:4eco.uk,  emoji island