Party Room係好多巴絲打嘅「秘密基地」,考完試、有開心嘢、放假等都會約埋去盡情玩同慶祝,唔使騷擾到人又唔會畀人(阿媽)𥄫到實~但如果大家已經對剩係坐定定打機、玩UNO等嘅Party Room玩厭咗,咁不如嚟觀塘新型Party Room──Tomorrowland Galaxy玩吓喇!呢度設計充滿科幻感,最犀利嘅係有AR同VR遊戲可以玩!

Tomorrowland Galaxy總面積約 5,500 平方呎,內部設計到成個太空船艙咁,一行入嚟就已經好似參加星戰,準備大戰一場。呢度引入日本好hit嘅AR電競對戰遊戲《HADO》,玩法同一般閃避球差唔多,喺一局 80 秒內攞到最高分就贏。參戰雙方分別由三個人組成一隊,戴上 VR眼罩同手腕感測裝置就可以展開對決。「戰士們」要以「氣功波」、「儲氣」、「放盾」等手勢做出相關效果攻擊敵人攞分或者保護自己,亦可以喪跑避開攻擊。

如果唔夠人組隊玩《HADO》都唔使灰,場內有兩部可以一個人玩嘅VR 遊戲裝置。一部係虛擬飛行,玩家行上升降台,著好裝備同戴埋VR 眼罩後,裝置會將玩家吊起。咁樣玩跳傘、滑翔傘等遊戲,真係有喺高空飛行嘅感覺。另一部裝置係VR 動感站立平台,玩家企喺可以做出傾斜、升降等移動效果嘅平台,戴住 VR 眼罩玩部份驚嚇類遊戲時,仲會營造出「離心力」效果添!

除咗上述比較high-tech嘅遊戲,場內都有波波池(約 400 呎)、拳擊機、街機等一般設施可以玩。呢度亦設有五間唔同大細嘅獨立party房,其中四間打通後更可容納超過80 人。仲講?齊齊約人開party喇喂!

Tomorrowland Galaxy資料:

地址:觀塘偉業街 128 號香港企業大廈 11 樓 A 室

營業時間:24小時

查詢及預訂:6890 4122

圖:Facebook@Tomorrowland Galaxy