唔少運動員嘅職業生涯好短暫,由於佢哋專心投入訓練,無咩時間去接受其他職業技能教育,以致部份人退役時難以投身新崗位,創業更係難上加難。有見及此,社企OnBoard喺一月推出計劃協助運動員搵工或創業,至今已經幫咗三名現役/退役運動員。其中水球前港隊代表沈瑩獲協助經營網上運動衫店,生意越做越好,預計年底生意額會增加三成!

前水球運動員沈瑩曾入選香港代表隊14年,2017年退役。佢喺2011年獲得平面設計學士學位,打算做平面設計師,但發現份工工時太長,凌晨十二點收工係家常便飯,根本就唔到水球訓練時間。由於唔想放棄打水球,沈瑩改任兼職設計師,之後成立訂造運動衫嘅網店。

沈瑩話店鋪成立之初無請人幫手,乜都要自己做,包括設計同送貨,但懷孕之後就覺得咁樣落去唔係辦法,於是喺OnBoard協助之下註冊成立公司,並獲得資金,自己亦從「零商業知識」漸漸學識招聘員工等公司管理知識。OnBoard亦介紹其他客戶畀沈瑩,令公司由以往主要做學校生意、訂貨數量唔夠100件,開始接受出貨數量達千件嘅大型活動訂單。沈瑩預計年底生意額會增加,並諗住開發環保物料衣物。

OnBoard其中一位創辦人劉家駿表示,運動員擁有自律、唔怕失敗等優秀特質,而僱主都需要具備呢啲特質嘅員工。佢希望透過協助運動員搵工同創業,為運動員揭開人生新一頁。

圖:大公報