個個都去深圳玩,唔通個個都識去深圳玩咩?深圳咁大,部份巴絲打(尤其係第一次去嗰啲)唔知從邊度玩起點算好?跟住地鐵沿線去玩就係幾方便嘅選擇。以下向大家介紹五個深圳地鐵一號線沿線嘅好去處,實有一個啱你心水~

1. Doors秘道・獨立劇情密室(老街站C出口)

密室脫逃遊戲近年好受歡迎,品牌响東門嘅分店目前設有三個劇情主題:《老房子》、《恐怖美術館2》同《復仇》,玩家需要投入劇情,查找線索、破解難題搵出口,大家作出唔同決定會導致不一樣嘅結局,令刺激感大增。《老房子》劇情催淚,比較易玩,適合入門級玩家;《恐怖美術館2》同《復仇》屬於驚嚇懸疑類,難度非常高,難到有網友玩完後都話「燒腦」。


2. 無弓射箭休閒空間(會展中心站B出口)

愛好運動嘅你肯定適合呢個射箭場同café二合一嘅室內空間,中心城分店嘅射箭場有6米、10米、12米同16米四種射道,玩家可因應能力自由選擇。店方會向玩家提供裝備,亦會安排專業教練在場指導。無論你有無玩過射箭,大人定係小朋友,只須帶個人嚟就可以享受射箭樂趣,玩到攰仲可以到店內café抖吓,食吓嘢。


3. 櫟韜・花園清吧(車公廟站C出口)

有輕音樂、花草同寧靜嘅酒吧,最啱情侶喺度談情或者三五知己嚟敘舊,當然打卡都唔錯。由於酒吧係露天設計,到咗夜晚仲可以欣賞深圳夜景。

4. NeverLand夢幻島私人影院(車公廟站J出口)

私人戲院嘅車公廟分店,提供舒適房間畀你同另一半/幾個巴絲打人少少睇戲(連4K畫質都睇到)。呢度電影種類都算齊,如果有指定影片想睇,最好嚟之前問清楚店家有無先。如果想邊睇戲邊食嘢,呢度都有出售多款零食同飲品。由於店家24小時營業,睇戲睇到夜可以免費使用一次性拖鞋、牙具、卸妝水、叉電線等物品,認真方便。

5. 作物DIY創意手作(高新園站A出口)

之前小編同大家介紹過誠品生活深圳店,呢間手作店就係開喺誠品入面。店家以木製品做主打,向客人提供手作工具同材料,再喺專業導師指導下去整屬於自己嘅獨一無二作品,而種類包括匙羹、杯墊、吊墜、拇指琴(Kalimba)等。如果唔想自己郁手做,都可以買現成嘅產品。

五個地方覺得唔夠喉?咁大家記得跟實小編,下次再同大家發掘玩樂新消息!

圖:網上圖片、Doors實景密室微信公眾號、無弓射箭休閒空間微信公眾號、美團、大眾點評

#深圳地鐵一號線