香港係繁忙嘅大都會,每日產生好多都市固體廢物,其中廚餘佔咗超過三成,平均每日產生約3,600公噸廚餘。咁多廚餘究竟點樣處理呢?除咗大家熟悉嘅方法——用嚟做有機肥料之外,原來用嚟發電都得㗎,只需三個禮拜就可以令廢物「重生」!

環境局局長黃錦星上星期四(16日)發表網誌,提到廚餘經處理後可變成能源,產生電力。位於北大嶼山小蠔灣嘅有機資源回收中心第一期(O.PARK1)係本港處理廚餘嘅設施,舊年開始營運,每日可處理達200公噸廚餘。O.PARK1回收廚餘後,先經過預處理系統、中央空氣污染控制系統、污水處理系統等處理,之後透過厭氧消化(Anaerobic Digestion)轉化為生物氣作可再生能源,最後經熱電聯產系統產生電力同熱能。

到底廚餘可以產生幾多電量呢?黃局長將O.PARK1同全港最大規模嘅太陽能發電場──小蠔灣污水處理廠太陽能發電場作比較。小蠔灣發電場共有4,000幾塊太陽能光伏板,年產電力約110萬度,而O.PARK1所產生嘅電力滿足完自身需要後,預計每年仲可以輸出約1,400萬度剩餘電力,相等於約50,000塊太陽能光伏板所產生嘅電力!

有機資源回收中心咁有用,得一期又點夠呀?黃錦星網誌亦提到,政府計劃分別喺北區沙嶺同元朗石崗起O.PARK2同O.PARK3,平均每日可處理各約300公噸廚餘。

圖:YouTube@環境局 Environment Bureau, HKSARG