四川名菜酸菜魚酸酸辣辣咁又開胃又惹味,近年嚟吸引咗唔少粉絲,專門食酸菜魚嘅餐廳更開到成巷成市。想食正宗酸菜魚?唔駛去四川嘅,近近哋上深圳就有得食喇!咁究竟邊間酸菜魚最好食?

喺咁多間酸菜魚餐廳當中,太二就最啱小編口味,事關太二除咗有唔搭台、唔接待四位以上客人等霸王條款同得意嘅宣傳之外,啲酸菜更係一絕,湯底又好飲,近年嚟都多咗唔少香港人去食。除咗太二之外,深圳限定嘅鱘龍記口碑都唔錯,佢主打用鱘龍魚嚟整酸菜魚,仲要係即叫即撈即整咁新鮮!

而另一間祿鼎記同埋太二都被稱為深圳最好吃嘅酸菜魚餐廳,佢強調油只會用一次,唔會重用,祿鼎記酸菜魚嘅辣度比較適合香港人,唔算太辣。有唔少網友推薦過店面裝修充滿少女味嘅撒椒、出名採用自家制酸菜嘅辣宴·老壇酸菜魚、選取黑魚嚟整酸菜魚嘅椒游老壇黑魚,係網民嘅好味之選,鍾意食辣嘢嘅朋友不妨試吓、比較返,睇吓邊間最啱自己口味喇。

圖:鱘龍記酸菜魚,辣宴微信公眾號,太二酸菜魚

#美食圈 #旅遊圈 #深圳 #酸菜魚