有回鄉證嘅人有福了!根據內地國家移民管理局所發布嘅消息,港澳居民由今年10月起,拎住俗稱「回鄉證」嘅來往內地通行證,就可以享用同內地居民身份證同樣嘅網上自助公共服務,包括交通運輸、金融、通訊、教育、醫療、社保、工商、稅務、住宿等9個領域多達30幾項嘅公共民生服務,當中包括醫院掛號、購買保險、考試報名、共用單車,仲可以辦理銀行、證券、手機開戶,同埋即時註冊開通網絡支付等等理財事項添!

據國家移民管理局嘅負責人表示,港澳居民同華僑手持嘅出入境證件將會納入認證服務範圍,即係不論各類政務、公共服務平台、互聯網應用端註冊,只要用有效嘅回鄉證登記,都可以乎合各領域「實名」、「實人」、「實證」認證嘅需求,回鄉證「升呢」後,相信港澳居民同華僑之後辦理各類型網上社會事務時就方便得多喇!

圖:中新網

#生活圈 #港澳居民 #回鄉證 #升呢 #網上公共服務 #認證