「一理通馬國明……」Sorry,應該係「一理通百理明,明白了計算可變簡單~」仲有食橙皮嘅傻校長、數學王子高斯等,ETV(教育電視)自1971年啟播至今已經有48年歷史,陪伴咗好多香港人成長,創作咗好多得意角色,不過隨著科技發達,依家屋企部電視都無乜人掂,唔知大家仲有無喺課堂或課後睇過ETV呢?

早前審計報告指,ETV製作成本高、效益低,社會上亦有人覺得不如摺埋佢好過。但一班用家──老師們就有唔同睇法。教協以問卷成功訪問咗656位小學老師,其中94.6%老師上堂會用ETV輔助教學(從來唔用嘅只有5.4%),約88%老師會喺課後輔導、家課自習等用ETV。同意保留ETV嘅老師有近95%,但亦有老師指ETV有啲位做得唔好,例如節目選擇唔多、節目內容唔切合課程或教學需要、節目內容不合時宜。對此,大部份受訪老師認為,ETV應該製作更多具趣味性同互動性嘅節目,而節目題材同內容應該配合課程。

圖:ETV

#ETV