近年海洋污染成為全球關注問題,塑膠、建築廢料等垃圾喺海上飄浮嘅畫面令人觸目驚心,但更令人震驚嘅係,依家連好少人去到嘅全球最深海溝──馬里亞納海溝(Mariana Trench)都受到污染,竟然有人類垃圾!

近日美國探險家Victor Vescovo打破「人類坐潛艇潛到最深海底」嘅世界紀錄,佢駕駛一艘小型潛艇潛到馬里亞納海溝10.928公里位置,比1960 年由一位美國海軍中尉所創嘅 10.912公里記錄多出0.016公里!只不過Victor開心嘅同時,亦感到好詫異,因為佢發現海溝除咗有好多特別生物,海床竟然仲有膠袋、糖果包裝紙同廢金屬等垃圾!

由於過去好少人能夠前往馬里亞納海溝探險,呢次喺海溝海床發現人類垃圾,確實令人震驚,反映海洋污染問題依然嚴重。Victor希望今次嘅發現可以喚醒大家關注,促請各地政府改善規管垃圾嘅法例。

圖:YouTube@The Telegraph、網上圖片

#馬里亞納海溝  #VictorVescovo