上個月《復仇者聯盟4:終局之戰》(Avengers: Endgame)上映,好多人睇完之後都意猶未盡,熱烈討論片中劇情同細節。近日有內地網友發現,片中復聯新總部,好似內地工程機械製造商三一重工(SANY)位於美國佐治亞州(Georgia)嘅工廠,立即引起其他網友話要去朝聖XD

呢位眼利嘅網友話,佢睇完《復聯4》就覺得個新總部好面善,似係自己之前參觀過嘅三一重工美國工廠。佢又話參觀嗰陣,三一重工負責人提過有《復聯》系列電影曾經喺工廠取景,但拍攝結束後就恢復原狀,只係剩低一道科技感十足嘅灰色大門。

有內地傳媒將三一重工美國工廠圖片同《復聯4》畫面對比,發現復聯新總部同工廠內外都有相似部份,例如工廠擺挖掘機嘅位置,喺電影用嚟擺「量子時光機」;鐵甲奇俠(Iron Man)同美國隊長(Captain America)世紀握手嘅背景似係工廠門外。

似到咁,唔怪之得好多網友睇完都話想飛去朝聖同打卡喇!

圖:搜狐、三一重工

#三一重工  #復仇者聯盟4