唔少演唱會都會向入場fans派發應援螢光棒、手燈等物品,等佢哋睇show期間可以玩燈海加強氣氛。但呢啲大量派發嘅物品多數只用一次,唔係幾環保。有見及此,本港樂隊Mr.嘅 Bass手Dash(譚健文)同細佬阿榮開發免費手機App「ShowWhat」,只需一部智能手機就可以自製燈海,慳返唔少資源。

「ShowWhat」可以設定燈光顏色、閃爍效果同變色頻率等,用家亦可因應唔同場合去使用「Concert Mode」或「LED Mode」模式,前者係入場欣賞音樂會用,後者係室內小型燈光派對用。Concert Mode由演唱會控制台發射訊號,用家入場後開啟藍牙、wifi同流動數據就可以用,唱到指定歌曲更會發出「Push Notification」提示,通知用家係時候舉高電話營造燈海喇!LED Mode由用家手機做主機,連接身邊有下載「ShowWhat」而且開咗藍牙同wifi嘅人,但目前IOS裝置及Android裝置分別只能連接同類系統裝置,IOS同Android想互相連接就要等下階段開發。

個App會喺今個月17同18號舉行嘅Mr.《Everyone Concert 10》演唱會首次應用,阿榮話大家開曬藍牙、wifi同流動數據,即使場內有接收盲點,都可以轉為連接其他用家發出嘅訊號,而理論上「ShowWhat」可以支援十萬個裝置同時使用。App內亦有「Gallery」功能,向fans發送演唱會主辦方影嘅相同片,等大家可以專心睇show,唔駛顧住影相同拍片。

圖:ShowWhat

#ShowWhat  #Mr.