我哋會用「臭味相投」去一班人之間性格、喜好、口味等都好夾,如果你中意食臭豆腐,尤其勁like嗰陣氣味,咁你同以下間臭豆腐廠真係「臭味相投」喇!不妨去應徵佢哋份「筍工」──聞臭師。近日湖南一間臭豆腐廠請聞臭師,負責聞各種滷水,檢查臭豆腐品質。

聞臭師月薪大約一萬四千蚊人民幣(約一萬六千港元),喺內地屬於高薪。呢個位須要輪更工作,每更12個鐘,期間要聞啲滷水夠唔夠味,判斷臭豆腐品質合唔合格。要成為聞臭師,除咗嗅覺靈敏之外,亦須符合多項條件,如唔煙唔酒、唔化妝、唔噴香水、唔搽指甲油、無鼻腔疾病等。

不過重賞之下未必有勇夫,廠方透露,好多入職者做唔夠一個月就劈炮,主要因為頂唔順長期喺「臭氣沖天」嘅製滷區工作,就連指甲罅都會有陣酸臭味。廠方公開一段招聘片段,片中九位應徵者「講就天下無敵」,但去到實測環節──聞七杯滷水時就「有心無力」。大部份人都難頂臭味,甚至表情痛苦,要即時捏住個鼻,表示月入過萬都頂唔住,而影片最後並無交代有無人獲聘。

圖:新湖南、中時電子報

#聞臭師  #臭豆腐