今日係農曆四月初八,除咗香港舉行太平清醮外,澳門鮮魚行都有醉龍節重頭戲──醉龍醒獅大巡遊。醉龍節係澳門鮮魚行獨有嘅民間傳統節慶活動,除咗舞醉龍、舞醒獅,呢日仲會派發龍船頭長壽飯,好有特色,連電視劇《愛‧回家》都有介紹過。

醉龍節原本只係鮮魚行行友定期團聚活動,之後演變成各界民眾都可以參與嘅大型節慶活動,並於2009年同2011年,先後入選《澳門非物質文化遺產清單》同《國家級非物質文化遺產代表性項目名錄》。每年農曆四月初七晚,澳門從事魚業批發或零售嘅居民會聚埋喺街市,席地而坐食「龍船頭長壽飯」,期間鮮魚行行友會舞動香案上嘅木龍祈福。到咗四月初八,行友舉行舞醉龍同醒獅巡遊活動。

今日嘅醉龍醒獅大巡遊喺上晝九點,由議事亭前地出發。舞醉龍嘅表演者通常係男性,佢哋一手揸龍身一手拎酒埕,邊舞龍邊飲酒,仲會將啲酒噴返出嚟。同日,鮮魚行喺紅街市、祐漢街市同三街會館向公眾派發龍船頭長壽飯,祝福大家身體健康、長命百歲!

圖:澳門特別行政區政府文化局 

#魚行醉龍節