近年嚟多咗唔少人關注環保議題,紛紛支持「走塑」、自備餐具等等。最近日本又有新產品嚟響應環保,就係推出食得嘅餐具,食完嘢食,再食埋個碟呀、筷子呀落肚,全程零浪費,啲餐具仲有幾款口味揀添~

日本公司丸繁製菓株式会社近排推出可食用餐具,好似碟同筷子咁,用嚟取代傳統嘅即棄餐具。雖然啲餐具食得姐,但如果唔好食咪一樣浪費,所以丸繁製菓特別研發出4種唔同口味——蝦味、芋頭、洋蔥同埋粟米味嘅碟,為求令大家連碟都食埋!依款食得嘅碟主要用麵粉同粟米澱粉製成,口感鬆脆之餘仲高度耐水,裝液體食物、雪糕等都無問題。除咗碟之外,丸繁製菓仲同Kumamoto IGSA & Tatami Conference合作,推出食得嘅筷子,佢嘅樣同口感似足百力滋,仲有豐富嘅營養價值同食物纖維,真係既環保又健康。不過,呢款食得嘅筷子都唔平㗎,5對就要2084円(大概148蚊港幣)。

圖:FB@株式会社 丸繁製菓

#環保圈 #可食用餐具 #榻榻米高纖筷子