電影《九品芝麻官》中,鬧交高手三姑(苑瓊丹飾)將烈火奶奶(魯芬飾)鬧到七竅出煙兼暈低嘅情節令人印象深刻,如果三姑喺現實中存在,相信可以轉行做代客鬧交。內地有網絡商家推出「專業代鬧交服務」,客人只要畀錢就可以叫商家將指定對象,鬧到「懷疑人生」。但有律師指呢種「服務」涉嫌違法,買賣雙方分分鐘要負刑事責任。

代鬧交服務收費「豐儉由人」,一般由5至200蚊人民幣(約6至232港元)不等,有特別要求,如使用地方方言就要加價,鬧交方式主要係打電話或發短訊。唔少商家都拍心口話包拗贏,「從未失手」,但亦有「良心」商家講明唔鬧貴州、四川或重慶人,因為肯定「鬧唔贏」。大部份商家擔心被當局或電商平台追查,所以一般只接受線下交易。

有內地律師指,如果收客人錢代替對方鬧交,係雙方之間嘅交易合同關係,但「代鬧交」屬於違反公序良俗行為,所以合同無效。如果商家打電話「疲勞轟炸」,干擾他人正常生活,甚至侮辱、誹謗他人,更加可能觸犯辱罵罪,收費亦屬於違法所得,所以小編奉勸大家千祈唔好亂試!

圖:電影《九品芝麻官》截圖

#代鬧交服務  #切勿以身試法