警察叔叔每日都要處理唔少交通事件,如果有人瞓响馬路賴死唔走而阻礙交通嘅話,警察叔叔嚟到梗係要趕佢走啦。只不過,今次阻路嘅唔係人,而係一隻海獅BB!佢之前攤喺條馬路度,任由途人出盡法寶將佢引返落海度,都不為所動,點知警車一嚟,海獅BB即刻自己乖乖地跳上警車,可愛到爆!

呢隻海獅BB喺美國三藩市一條繁忙嘅公路度做「路霸」,有司機嘗試用手巾仔引佢返落海,但海獅BB一於懶理。途經嘅司機無曬辦法,又擔心海獅BB嘅安危,唯有報警處理。點知警方一到現場,海獅BB好似就係等緊警察叔叔嚟接佢咁,即刻自動自覺跳上警車「自首」,認真合作。海獅BB應該嚟自附近水域,好健康、無受傷,警方會等佢恢復之後先放生返棲息地。

圖:FB@CHP - San Francisco

#動物圈 #海獅 #美國三藩市