唔少大型節慶活動現場都設有飲食攤檔,方便參加者醫肚,但部份檔口使用即棄餐具,造成浪費之餘又唔環保。有見及此,尋日(5日)開鑼嘅青衣戲棚入面除咗有環保團體免費借用餐具,現場小食攤檔亦出招撐重用餐具,齊齊出力,為環保盡一分力。

今次青衣戲棚嘅活動係慶祝天后誕,環保團體「綠領行動」聯同葵青區議會、餐具借用機構「Utentials有叉用」,喺現場提供免費借用餐具服務,入場市民只要畀20蚊按金,就可以免租金借用碗筷、叉同摺疊式餐盒,歸還餐具時可以攞返按金,換言之係免費~佢哋同時喺場內設置回收站,回收塑膠、廢紙、廚餘、廢食油等,從多方面減少浪費。

場內舉行「綠攤檔」選舉,所以唔少小食攤檔都出招鼓勵市民使用可重用餐具。有飲品檔提供折扣,只要客人自攜可重用膠樽消費,一律減價十蚊;有糖水檔會為自帶餐具嘅客人增加糖水份量;有售賣懷舊小食嘅攤檔鼓勵客人自備餐具,呼籲即買即食嘅客人唔好要膠袋,並收少一兩蚊。

圖:Facebook@greenersaction.org

#重用餐具  #青衣戲棚