如果要揀幾支經典樂隊嘅話,相信英國披頭四樂隊(The Beatles)會榜上有名。雖然披頭四係50幾年前成立嘅樂隊,但佢哋嘅音樂文化影響至今,為向呢支傳奇樂隊致敬,深圳灣萬象城即日起至7月7日舉辦「從未止步!披頭士時尚藝術展」(The Beatles:Beat On),參觀者可以喺多維沉浸式體驗空間,領略披頭四魅力!

(圖:網上圖片)

(圖:網上圖片)

現場展出超過250件同披頭四有關嘅珍貴物品,包括黑膠、紅膠、經典唱片同報章雜誌報道等,亦會展示100張記錄1963至1972 年披頭四最巔峰時期嘅攝影作品,一定令參觀者大飽眼福。如果暫時未有得飛去英國「洞穴俱樂部」(Cavern Club,披頭四出道初期表演嘅地方)朝聖都唔緊要,呢道有個展廳復原返洞穴俱樂部,同樣係打卡熱點。

(圖:網上圖片)

(圖:網上圖片)

展覽除咗有嘢睇,亦有嘢玩。參觀者可以一邊行過彈奏五線譜嘅音樂馬路,一邊睇六個感動歌迷嘅時刻。現場仲有個復原嘅披頭四經典舞台,以現代數碼科技營造出真實演出環境,參觀者可以踏上舞台,搞返次屬於自己嘅演唱會。

圖:網上圖片

#音樂圈  #披頭四樂隊  #TheBeatles