近年香港積極推廣電動汽車,但目前仲未係好普及,電動車喺馬路上仲係好少見。鄰近嘅廣州就已經用緊純電動的士,近日再有1500架投入服務,並計劃用兩至三年實現的士全面電動化。

新一批純電動的士由廣汽新能源汽車有限公司製造,電池續航里程為410公里。的士車廂更大更闊,載客量係傳統的士嘅兩倍,但運輸成本就更低。有司機話,以前揸傳統的士行一公里要五毫子,依家揸純電動的士行一公里只需兩毫子。有份營運的士嘅白雲(廣交)公司表示,廣汽會為呢批的士嘅電機、電控、電池系統提供五年或70萬公里嘅保用期。

廣州市出租汽車協會指,目前廣州有兩萬三千架的士,其中純電動的士有3190架。協會將推動各的士公司轉用純電動的士,爭取喺未來兩至三年實現的士全面電動化。

圖:廣州市公共交通集團

#純電動的士  #廣汽新能源