印尼科莫多「粉紅沙灘」,由於其獨特嘅顏色,每年都吸引唔少遊客慕名而至。遊客見到嗰咁靚海灘當然會趁機影下靚相,兼打卡呃Like。不過,最近有遊客為咗影相,竟然將棲息喺潮間帶嘅海星拎起,呢個行為分分鐘會整死啲海星!
因為當海星離開水面,海星嘅腮會失去水份,令佢地便難以呼吸,而且當時間超過10-20分鐘,仲會令海星脫水窒息而死。另外,遊客拎起海星影相時,佢地手部嘅溫度超過30度,比海星體溫高約10至20度,溫差仲會令海星「燙傷」添。
睇到呢到,我諗大家都知拎起海星影相呢個行為,對海星造成好大影響,甚至會令海星死亡。大家下次去海灘時,自己都唔好咁做,仲要提醒身邊嘅親友,要好好保護海洋生態。
圖:facebook@Muchlis Transport Lombok