如果話係交通工具到漏得最多嘅嘢,相信好多人都會諗起雨傘,但原來係巴士、鐵路、甚至飛機等等交通工具都會收到好多千奇百趣嘅失物,係日本就有鐵路公司會不定期舉辦失物市集,幫啲千奇百趣嘅失物搵返個新主人。 


係日本,一般嘅失物會由鐵路公司保存一個星期,一個星期後都無人認領就會將失物交去警局保存三個月,如果三個月後都無人認領,一個名為「忘れ物リサイクル市」嘅失物市集就會將啲超過保存期限嘅失物以低於市價嘅價錢賣出。係市集當中可以見到失物嘅種類係非常多,除咗最常見嘅雨傘外,仲會有電鬚刨、耳機、遊戲機、同以近視深淺度排列嘅眼鏡,估唔到嘅係連相機配件、鏡頭,甚至係名貴珠寶都有得賣。如果唔想係個失物市集見返你嘅失物,記得落車時拎齊嘢嘞! 


圖:FB@京阪電氣鐵道株式會社


#生活圈 #日本 #日本鐵路公司 #失物市集 #千奇百趣