雖然恐龍已經滅絕咗幾千萬年,但唔少人對佢哋依然好有興趣,嘗試透過圖畫、電影、展覽等去了解地球曾經嘅霸主。廣州廣東科學中心即日起至10月7日,舉辦「世界上最大的恐龍」國際巡迴展,有得睇巨型馬門溪龍(Mamenchisaurus)模型,仲可以體驗挖掘恐龍化石過程,保證有嘢學有嘢玩!

(圖:信息時報)

(圖:信息時報)

展覽介紹多種巨型恐龍,除咗馬門溪龍,仲有阿根廷龍(Argentinosaurus)、圓頂龍(Camarasaurus)同其他蜥腳類恐龍,展示佢哋嘅模型、化石、標本鑄模等。其中最吸睛嘅展品,非馬門溪龍模型莫屬。模型以1:1比例製作,長60英尺,直立肩高11英尺,真實呈現馬門溪龍有幾龐大。模型兩側各有不同,一側係完整嘅皮膚紋理,另一側係模擬解剖後嘅情況,露出心肺等主要器官,等觀眾可以從外到內,將馬門溪龍睇通睇透。

(圖:信息時報)

(圖:廣州市科協會微信公眾號)

除咗有得睇,觀眾亦有得玩。展覽安排一系列互動項目,例如用手搖泵幫恐龍「輸血」,了解血液從恐龍條長頸輸送到頭部所需嘅壓力;戴上護目鏡,喺模擬挖掘坑體驗挖掘恐龍化石嘅過程。


圖:信息時報

#恐龍  #廣東科學中心