「望前看,想像戴著四方帽時多美麗~」大學生辛苦咁多年完成學位,當然希望喺畢業禮同家人分享喜悅,見證自己「得咗喇!」菲律賓大學生Jeric R. Rivas都有呢個願望,只可惜父母未能出席畢業禮,令靠半工讀完成學位嘅佢喺畢業禮後傷心痛哭。

讀犯罪學系嘅Jeric喺Facebook透露,自己細細個就要獨立生活,缺乏父母照顧,甚至連佢哋生死都唔知。佢試過投靠親戚,但無人肯收留。於是Jeric決定靠自己,喺快餐店、工廠打工同埋做家傭賺錢生活。

Jeric讀書都好叻,小學同中學都以優秀成績畢業。當時佢已經希望父母可以出席畢業禮,見證其光榮時刻,可惜事與願違。Jeric入讀大學後,有教授知道佢嘅情況,決定資助學費同生活費,而Jeric亦努力完成學業,希望父母會喺大學畢業禮出現,為佢嘅成就感到自豪。

只可惜Jeric願望再次落空,畢業禮上當司儀嗌到佢個名,父母都係無出現。一班教授見到後,主動陪Jeric上台,但佢之後都忍唔住傷心痛哭。Jeric話可能父母至今都未接受佢喺佢哋生命出現,但都希望父母知道仔仔嘅成就並為此感到自豪,同時感激教授一路以嚟嘅幫忙。 


圖:Facebook@Jeric R. Rivas