一名鞋店經理喺Facebook 専頁「西客之道 Hispitality Secret」發文,話自己遇到一位無理媽媽,拎住對兩年前買既鞋到店鋪,以「唔啱Size」為理由,要求換貨。店鋪經理梗係拒絕佢嘅要求,點知位媽媽發脾氣,仲揚言會投訴嗰經理,令佢「份工都無埋」。


帖文指出,早前有位媽媽拎著對用膠袋笠住,連鞋盒都無嘅鞋到店鋪,要求更換啱Size嘅鞋。經理要求對方出示購物收據時,嗰媽媽話對鞋兩年前買落,點會仲有單。經理解釋貨品出門14日之內先可以換貨,所以隔咗咁耐係無得換。但嗰位媽媽指責係當時鞋店職員比錯Size,令12歲既仔仔依家著唔落對鞋。經理無奈回應,兩年前仔仔10歲,依家大個咗,對腳都會跟住大,唔啱著都正常。


點知位媽媽知道無得換貨後,一怒之下打電話去鞋店公司投訴。但由於撞正周日,所以寫字樓無人接聽電話,最後位媽媽話要投訴到個經理「份工都無埋」。唔少網民紛紛留言,直斥港媽唔合理,仲話佢係「根本嚟攪事!」


圖:sfdsneakerstore