「憑自我硬漢子,拼出一生癡。流汗血盡赤心,追尋大意義……」警察通常畀人英勇、威武嘅印象,但其實佢哋都有文藝一面。佛山公安局禪城分局特警林天浩負責區內應急突發巡邏工作,佢除咗識揸槍,原來拉小提琴一樣咁叻!

林天浩今年31歲,身高一米八五。佢6歲開始學小提琴,喺大學都係讀同音樂有關嘅科。2013年加入警隊後,拉小提琴成為佢放鬆身心,紓緩工作壓力嘅方法。入職之初,林天浩係派出所民警,拉人審犯都好緊張,「有種緊繃的感覺」。於是佢拉起小提琴,「只需要15至20分鐘,集中注意拉琴,就不會想煩心的事情」。之後佢成為刑警、特警,依然時不時拉吓小提琴,「一般回家想想旋律都能演奏出來」。

睇落大纜都扯唔埋嘅「特警」同「小提琴」,喺林天浩眼中都有共同點。細個練琴好辛苦,而特警平時訓練強度都好大,學琴經歷令佢磨練出堅毅嘅意志,更好完成特警訓練任務。「琴要經常拉,越拉聲音越好聽,太久不拉的話,出來的聲音會松散」,特警都一樣,要經常訓練,「每天都要訓練,每季度還要拉練一次」,咁樣先可以保持最佳狀態。


圖:南方都市報

#音樂圈  #警察圈  #特警  #小提琴