尋日(22日)我哋同大家報道,廣州市南沙區為慶祝媽祖(又稱天后)誕辰1059周年,舉行媽祖文化旅遊節。廣州南沙好早就有祭祀媽祖嘅習俗,幾乎每條村都曾經有自己嘅天后廟。今日就同大家介紹吓位於塘坑村塘坑中街29號嘅天后古廟,始建於明朝,係廣州現存最早嘅天后廟。

古廟坐北朝南,佔地面積約130平方米。牆身由青磚砌成,花崗岩石腳。廟門前西側有一口花崗岩井口、紅砂岩井身嘅石井,依家仲有村民嚟攞水。廟中保存咗一方清嘉慶三年嘅石碑,高1.45米,寬0.48米。

碑文提到媽祖保佑村民生活嘅方方面面,例如有幾次旱災,村民向媽祖求雨,保佑佢哋度過難關。而正因為媽祖好靈,所以村民有啲咩重要事都選擇喺古廟商議,由媽祖做見證。


圖:南沙區政府

#媽祖  #塘坑村天后古廟  #廣州南沙