塑膠垃圾破壞自然生態嘅事實好多人都知,但大家通常比較多關注塑膠垃圾對於海洋生物嘅傷害,其實喺陸地棲息嘅動物都身受其害。美國攝影師Chris Jordan用咗9年時間拍成一部叫《ALBATROSS》嘅紀錄片,向世人揭露塑膠垃圾點樣禍害信天翁。

(圖:www.albatrossthefilm.com)

片中嘅信天翁棲息喺美國管轄嘅中途島(Midway Atoll),即使呢道距離最近嘅大陸有成超過2000公里,但大批塑膠垃圾都隨海飄至,嚴重污染生態環境,島上信天翁被迫同垃圾住埋一齊。此外,成年信天翁會將BB留喺島上,一星期內飛行約1萬6千公里去其他地方覓食,但由於塑膠污染太嚴重,令成年信天翁只能叼啲塑膠殘片返嚟,當食物餵信天翁BB……而最終會因為食得太多塑膠垃圾而猝死。

(圖:www.albatrossthefilm.com)

Chris Jordan對於呢個情況既憤怒又心痛,佢希望《ALBATROSS》呢部97分鐘嘅紀錄片可以畀大家知道塑膠污染嘅嚴重,連遙遠嘅中途島都無法幸免,同時傳達以下訊息:「一個人嘅力量好難改變世界,但如果更多人意識到呢個訊息,世界或者能向好方向一啲啲慢慢靠近。」如果大家想睇《ALBATROSS》,可以click入呢個網址:https://www.albatrossthefilm.com/watch-albatross。


圖:www.albatrossthefilm.com

#生態圈  #塑膠污染  #中途島  #信天翁