歌手楊千嬅依家做緊以「MY Beautiful Live」為主題嘅世界巡迴演唱會,喺第一站廣州取得「開門紅」後,上星期六(13日)嚟到第二站珠海。演唱會安排喺戶外體育場舉行,但當地一直落大雨同有雷暴警告。好彩開show前約10分鐘停雨,千嬅得以順利完成演唱會。

之前千嬅表示落住雨開show對自己同觀眾都唔好,所以當雨一停,千嬅非常開心。喺現場約25,000名粉絲前,千嬅落力演出,佢唱《小星星》嗰陣,全場粉絲更打開手機燈營造「星海」。千嬅見到後感動落淚,同粉絲講:「多謝你哋!好靚呀,我第一次喺自己個舞台道得到好多小星星,都唔算太遲!」

完成珠海站個唱後,千嬅將會喺下個月11號(星期六)去到肇慶做第三站個唱,兩萬張門票喺開售後唔夠四分鐘就全部賣晒!而五月底嘅深圳站更加因為反應熱烈而加開一場,有5月24日同25日兩場。


圖:Facebook@MY Beautiful Live 楊千嬅世界巡迴演唱會

#楊千嬅  #MYBeautifulLive楊千嬅世界巡迴演唱會