近年香港積極推廣生態旅遊,向外地旅客介紹本港各個郊野公園同地質公園,等佢哋感受香港嘅自然之美。鄰近嘅珠海亦都有豐富嘅生態旅遊資源,其中有六個行山好地方,身為山系男/女孩嘅你唔好錯過喇!

1. 鳳凰山

鳳凰山係個森林公園,景點主要有長南逕古道、鳳凰水庫等。行山者可以沿著鳳凰水庫而行,欣賞沿途美景,甚至可以登上鳳凰山頂,感受「大地在我腳下」。鳳凰山上有座普陀寺,寺內有齋飯供應,行到攰攰哋可以喺呢道休息。

(圖:網絡)

2. 腦背山

腦背山位於橫琴島,又被稱為「風車山」,因為橫琴島風能資源豐富,山上安裝咗好多發電風車。腦背山植被茂盛、空氣清新,登上山頂可以眺望珠海同澳門全景。

(圖:網絡)

3. 黃楊山

黃楊山有「珠海門戶第一峰」之稱,氣勢磅礡嘅瀑布、清澈如鏡嘅溪流都係好吸引嘅景觀。除咗自然風景,呢道亦有人文景觀,如乾隆時期起嘅金台寺、舊時文人墨客必到嘅第一石門。

(圖:網絡)

4. 黑白將軍山

黑白將軍山景區由黑面將軍山同白面將軍山組成,一年四季都適合行。依家四月山花盛放,春意盎然,可以賞下花,放鬆下心情。

(圖:網絡)

5. 板樟山─石景山

板樟山─石景山位於珠海市區,前往方便,行起上嚟亦較輕鬆。山腰、山頂、湖畔、索道、石景等都係唔錯嘅影相打卡位。

(圖:網絡)

6. 斗門鍋蓋棟

鍋蓋棟一山兩澗,山水構成怡人景色,但行起上嚟比較辛苦。沿途有得欣賞清澈嘅溪流、飛躍而下嘅瀑布、泛起漣漪嘅石潭水、空幽嘅竹林等,仲可以去埋附近嘅坭灣村。

(圖:網絡)


圖:網絡

#行山圈