近年開始興無人機,高空拍片或者拍危險鏡頭都可以用無人機搞掂,咁你哋有無諗過,無人機仲可以送外賣、快遞?近日Google嘅母公司Alphabet旗下嘅無人機公司Wing Aviation,就通過咗澳洲民航安全局(CASA)批准,喺澳洲首都坎培拉正式推出首個商用無人機嘅派送服務。

Wing嘅無人機喺過去18個月嘅試運期間,共完成咗3000次交易而且無意外發生。而喺早幾日,CASA正式發表聲明話無人機已成功通過安全評估,可以正式向居民派送外賣。顧客只需要喺Wing嘅應用程式入面買嘢,俾咗錢之後嘅數分鐘內,商品就會透過無人機即時送貨到府上,真係快捷又方便!

不過,無人機都有佢嘅相應限制,例如唔可以喺主要道路上飛行、要維持喺5公尺以上嘅高度飛行、派送貨品需離大眾至少2公尺以上、要將物品降落到買家面前等等。而無人機嘅飛行時間亦有限制,例如喺平日早上7點前、星期日朝早8點前同每晚上8點後都禁止飛行。雖然無人機又快又方便,但就曾被當地居民投訴話無人機飛行嘅噪音太大,影響佢哋嘅日常生活。

圖:YouTube@Wing

#科技圈 #WingAviatio無人機 #外賣快遞