依家係內地賞櫻時節,好多人會去公園賞櫻,但有遊客做出如爬上櫻花樹影相、大力搖樹整落啲花瓣等無品行為,大煞風景。為咗杜絕呢啲行為,近日北京各市屬公園諗住設立「遊園黑名單」制度,限制無公德心嘅遊客遊覽公園。

「遊園黑名單」制度參照2016年實施嘅《北京市旅遊不文明行為記錄暫行辦法》,《辦法》規定無品遊客會被列入「旅遊不文明行為記錄」黑名單,而名單會被通報至各景區、博物館,甚至旅行社同酒店,有關遊客會被限制買飛參觀其他景點。

公園方面會將嗰啲屢勸不止、破壞文物等行為惡劣嘅遊客列入黑名單,並會運用人面識別系統辨識呢啲遊客,限制佢哋遊覽公園,同時震懾其他遊客。


圖:微博@刀兄

#遊園黑名單  #公園