今屆香港中學文憑試進行到如火如荼,個個考生都落力應試想考個好成績,咁唔知大家有無聽過「開筆禮」?廣州西關近排舉行咗個開筆禮,唔少學生都有去參加,相傳掌管考試同文運嘅文曲星手上有一支筆,邊個被呢支筆點中,就可以高中。唔知各位應屆考生又有無興趣參加呢個開筆禮,睇吓有無機會被文曲星關顧吓考個好成績呢?


就喺今個月8號,開筆禮揀咗喺廣州西關荔枝灣景區文塔舉行,因為民間傳說話文塔係供奉文曲星、掌握文人功名同命運嘅神塔。而相傳清代廣東省出過嘅3個狀元(莊有恭、林召堂、梁耀樞)都曾經去文塔祭拜祈福。究竟個開筆禮係點進行嘅呢?喺8號果日,30個身著漢服嘅學生喺老師嘅帶領下,先係整裝習禮、敬拜儀式,代表要「先正衣冠,後明事理」,自細就學習禮儀同識得尊師重道。跟住就由師長用朱砂喺學生嘅額頭度點上紅痣,寓意學生從此眼明心明,鍾意讀書同埋讀書叻啲。之後係啟蒙描紅,學生學寫「人」字,寓意做人首先要堂堂正正、頂天立地。最後就係喺文塔祈福,學生繞住文塔行三個圈。咁樣就大致完成咗成個開筆禮喇,點解當年小編考試果陣唔知有呢個開筆禮呀!


圖:網上圖片


#校園圈 #開筆禮 #廣州西關