大家仲記唔記得自己6歲果年做過啲乜?好開心咁玩緊?定已經要返學、返各種興趣班?英國有個患有自閉症嘅6歲小朋友Joshua Beckford就已經入咗牛津大學讀書,成為牛津史上最後生嘅學生,而宜家14歲嘅Joshua仲被列入世界排名前30名影響社會嘅自閉症傑出人才添。

Joshua自細就被確診患有高功能自閉症,但佢從來無因此而自卑,3歲果陣已經自學咗日語、中文同普通話,甚至無師自通咁用電腦做外科模擬手術。佢仲立志成為神經外科醫生或一名太空人,希望可以研究人類大腦同解剖學,從而改變世界。Joshua 6歲果年,佢爸爸知道牛津大學有一個專門針對8至13歲嘅兒童課程,於是佢就寫信俾牛津,希望可以俾Joshua入學,最終令Joshua成為牛津史上最年輕嘅學生。

除咗讀書叻之外,Joshua亦積極關注社會問題,為有需要嘅兒童爭取權益。佢唔單止係全國自閉症協會黑人同少數民族嘅代言人,仲被任命為低收入家庭教育(L.I.F.E)嘅宣傳大使,為社會弱勢社群發聲、為低收入家庭兒童創造教育機會。Joshua仲為3個自閉症慈善機構籌集資金,提倡拯救地球。Joshua嘅成就令佢嘅父母感到自豪,佢爸爸仲話,要養育一個患有高功能自閉症嘅小朋友係一個好大嘅挑戰,需要父母嘅體諒同包容。

 圖:網上圖片

#愛心圈 #Joshua Beckford #6歲自閉症神童