小朋友未懂事,有時候會郁手打人,以為可以用武力去解決問題,身為家長緊係唔可以容許依啲事發生喇,但台南就有位媽媽教個女要以暴易暴,當住全班師生面前叫個女摑返蝦佢果位同學仔!依啲係咩嘅家教啊?


台南有位小四學生2年前係天才表演環節被選中咗做女主角後,被另一位女同學當眾掌摑,之後仲一直被同學欺凌添,但佢一直都無話俾佢媽咪,直到最近女女得獎,佢唔單止無好開心,仲一直都好惶恐不安,媽咪察覺到佢有唔妥下追問,先知道女女原來俾人蝦咗咁耐!


最後,媽媽認為如果向學校投訴,女女最多只會聽到一啲道歉嘅說話,最後佢決定要「欠巴掌債還巴掌債」,帶埋女女一齊返學直接搵蝦佢果位同學對質,仲叫女女當住全班同學面前掌摑返佢嚟報復,仲話如果之後有咩後果佢都會一力承擔。最後,女女係媽媽多次催促嘅壓力下,真係動手摑返果位同學,而果位同學可能都被佢地嘅舉動嚇親,不停咁道歉。


之後媽媽仲要同女女講要學識保護自己,做錯事可以受罰,但無做錯,就唔可以白白被欺凌。好多網友睇到後都有唔同嘅睇法,有啲就覺得學校做唔到野,唯有家長出手,有啲就覺得教小朋友以暴易暴依個做法係唔岩。小編就覺得郁手就係唔岩,就算原本係受害人,但郁手去報復,就會由受害者變成施暴者,萬一女女要受到法律制裁,唔通媽媽又真係可以頂罪咩!


圖片來源:Facebook圖片


#學生圈 #欺凌 #虎媽 #以巴掌還擊 #以暴易暴 #要保護自己 #教壞細路