去電影院、劇場或座談會時,開埸前都會有廣播叫大家收埋手機,專心欣賞接下來嘅節目。原因好簡單,放低手機專心去睇一個節目係對製作人、演出者或講者嘅基本尊重嚟。日前歌手陳奕迅(Eason),喺一間大學舉行「L.O.V.E. in F.R.A.M.E.S. 大專巡迴分享會」,期間Eason 不滿在埸同學一味低頭玩手機,更出口請無心聽分享嘅同學離開,Eason仲嬲到取消埋大合照環節,最後分享會喺一遍尷尬氣氛下完結。


社交網有一篇文章講述當日嘅情況,話分享會前大會先播放「Eason and The DUO Band “L.O.V.E. in F.R.A.M.E.S.” 音樂紀錄片」,當時同學已經掛住玩電話,無咩點睇條片,好彩嘅係Eason同其他分享嘉賓未入埸,所以見唔到啲學生反應咁差。後來Eason 入咗嚟做Sharing ,開埸氣氛都OK,但玩電話嘅同學都係繼續做低頭族。Eason就喺台上重演學生玩電話嘅動作,然後再以拇指向下手勢並搖頭,示意同學唔好喺分享會期間玩電話。去到問答環節,氣氛急轉直下…第一、二位同學舉手提出要求合照嘅問題,完全同分享會嘅內容無關,Eason就黑面嘞!Eason 話見到在埸同學一味掛住玩電話,從來無專注喺音樂分享會上,覺得不被尊重,又好嚴肅咁請無意交流嘅同學離開。最後連大合照都取消埋,分享會就草草收場。


年輕人,其實放低手機1-2個鐘唔係好難啫~ Respect 吓講者嘞,呢啲係對人基本嘅尊重嚟架!


原圖:EAS MUSIC IG 

 #基本尊重 #放低手機 #Eason #音樂分享會