星光大道上嘅李小龍銅像,每日都吸引好多人嚟欣賞同打卡,表達對呢位著名武術家兼功夫巨星嘅喜愛。如果大家想以創新方式多啲了解李小龍,咁就要去李小龍祖居睇吓喇!近日位於廣州荔灣區永慶坊嘅李小龍祖居經修繕後重開,入面運用咗3D全息投影等創新科技介紹李小龍。負責修繕嘅設計師話:「重新修繕後,無論從內容還是呈現載體上,都能讓大家了解一個更加立體化的李小龍和西關大屋文化。」

李小龍祖居本身係李小龍父親李海泉買入嘅一座西關大屋,起於民國時期,佔地超過200平方米,2016年起向公眾開放。今次祖居第二次修繕,最大程度復原本身嘅面貌同格局。除咗展示關於李小龍嘅歷史資料外,重開嘅祖居仲以創新科技配合展覽,等參觀者可以同李小龍「隔空交流」。例如「武學天才」展廳內嘅3D全息投影裝置,系統將李小龍功夫嘅一招一式全部還原,好似李小龍真係喺你面前出招,你亦可以耍返幾招同李小龍「切磋」吓。

李小龍唔只係武術家,仲係一位哲學家。祖居亦設有介紹李小龍哲學觀嘅展廳,裡面係一個360度沉浸式交互體驗空間,由「水」同「竹」兩個元素組成。當參觀者行走,腳下就會出現「水」漣漪效果或發出踩到「竹」葉嘅音效,喺虛實交匯中領略李小龍哲學。


圖:羊城晚報

#李小龍祖居