救人係醫生嘅天職,無論身處乜嘢地方,佢哋都會盡力救助有需要嘅人。近日深圳嘅黃振醫生從卡塔爾首都多哈(Doha)搭飛機回國,突然機上有位乘客癲癇發作,黃醫生出手相救並穩定其病情,直至飛機抵達目的地,乘客被送往醫院。


黃醫生任職於中國醫學科學院腫瘤醫院深圳分院,當日佢參加完喺西班牙舉行嘅學術會議後,由多哈轉乘卡塔爾航空(Qatar Airways)客機返廣州。飛機起飛無耐,機上一位乘客突然昏迷,疑似內出血,於是機組人員發出緊急呼叫醫生嘅廣播,黃醫生亦立即響應,趕去救治患病乘客。


經初步檢查,黃醫生發現患者出血係因為突發抽搐後咬損自己手指所致,佢又從患者同行人士得知患者有癲癇症,因此判斷患者今次係癲癇再發作。機組人員曾經考慮折返航機以救治患者,但黃醫生見患者漸漸恢復意識,暫時無生命危險,認為飛機唔使返航。


雖然飛機可以繼續飛往廣州,但黃醫生考慮到患者安全,都同卡塔爾航空嘅地面醫護人員聯絡,對方判斷患者係低血糖誘發癲癇發作,並同黃醫生商量好先為患者補充血糖。黃醫生隨後配好糖水畀患者飲,再同機組人員將患者安置喺機艙較闊而且空氣流通嘅空間。


飛機抵達廣州白雲機場後,患者隨即被送往醫院進一步救治,黃醫生落機後亦獲機組人員致謝。黃醫生表示,癲癇症患者搭飛機嗰陣長時間處於封閉空間,容易誘發癲癇,佢哋應該隨身攜帶寫有病情同緊急聯絡人資料嘅卡片,萬一發生意外都可以提示其他人正確處理。


圖:網絡

 

#醫療圈  #高空救人